Steikt juletorsk med rabbestappe, rosenkål og baconfeitt

Norsk julemat handlar om tradisjonar,  geografi og kva type mat ein før fekk tak i til jul.  Til jul skulle det vere den beste maten ein kunne få tak i som svineribbe, pinnekjøtt, lutefisk og juletorsk, men også kveite, kjøtmølje og risgraut var og er vanleg.

Å ete fersk torsk til jul er typisk for Sørlandet, men om ein les boka «Den gamle sunnmørsjula» (Brunstad & Pettersen) finn ein at det også var viktig med fersk fisk til jul på våre trakter. Boka fortel at i fjordbygdene på sunnmøre var stor skam for den husbonden klarte å skaffe fersk fisk til jul.

I dag kan vi kjøpe torsk i butikken fersk og frosen, og det er fiska for oss. For å lage torsk «julete» handlar det om kva som er til, som til dømes i helgas juleoppskrift med rabbestappe, rosenkål og bacon. Nyt den gode julematen, også vil eg ønske alle mine lesarar ei fredfylt og god julehøgtid!

TORSK: Steikt juletorsk med rabbestappe, rosenkål og baconfeitt. Foto: Aina Hole, Norges sjømatråd.

Ingrediensar (4 pers)

800 g torskefilet

2 ss smør

 

Rotmos

1 kg kålrot

2 stk gulrot

1 stk sellerirot

1 dl kremfløte

3 ss smør

2 ts salt

½ ts pepar

½ klementin

 

250 g bacon i terningar

100 g smør

 

300 g rosenkål

2 ss smør

2 ss brunt sukker

 

12 stk mandelpotet

Framgangsmåte

Skrell og skjer rotgrønsakene i terningar og kok dei møre i lettsalta vatn. Sil av vantet og mos grønsakene til ei grov stappe. Ha i smør, spe inn fløyten og smak til med salt og pepar. Steik baconbitar i smør på lav varme til baconet er gjennomsteikt. Reinsk og del rosenkål i to og steik dei møre i smør i steikepanna Tilsett sukker og steik videre medan du vender på rosenkålen til sukkeret har smelta. Del torskefileten i passe porsjonsstykke og steik dei i litt smør i panna i ca. fem minutt på kvar side.

Server retten med kokte mandelpoteter til.