Omnsbakt torsk med pesto og bacondadlar er ein himmelriks munnfull!

«Ein himmelriks munnfull» er namnet på ein dessert av eggedosisfromasj, sherry, mandlar, sjokolade og coctailbær med store smakskontrast i søt, surt og bittert. Når eg skal prøve å beskrive smaken av bakt torsk med pesto og bacondadlar vart det også ein himmelriks munnfull. Smakskontrastane er store; mild fisk med frisk pesto og ekstra spesielt med den søte daddelen med det salte og sprø baconet rundt, dette er rett og slett ein smaksrikt.

Daddel er ein søt, aromatisk og litt klebrig frukt, den er ofte skildra som ørkenens delikatesse og i Norge er den mest kjent som tradisjonsrik julesnaks. I dag vert det dyrka mest dadlar i Nord Afrika og Midtøsten, frukta veks på palmar og under palmeblada veks daddelklasane som kan innehalde meir enn 2000 dadlar.

Bacondaddel er ein populær appetittvekkjar som ofte brukast til tapas og dei passar også perfekt som tilbehør til fisk. Ein kan bruke dadlar både med og utan stein, det er smak og behag. Eit tips er å bruke tretannpirkarar utan smak og å leggje dei i vatn før bruk, då tek den ikkje fyr under matlaginga. Då er det berre å svinge grytene på kjøkkenet, god helg!

BACONDADLAR: Omnsbakt torsk med pesto og bacondadlar er ein himmelriks munnfull. Foto: Norges Sjømatråd, Marianne Aaronsen.

INGREDIENSAR til 4 porsjonar:

800 g torskefilet, utan skinn og bein

2 ss salt

PESTO

1 dl frisk bladpersille

1 dl pinjekjerner

2 ss parmesanost

1 fedd kvitlauk

1 dl rapsolje

salt og pepar

BACONDADLAR

4 skiver bacon

8 stk daddel

1 ss smør

tannpirkarar

TOMATSALAT

4 stk tomat

½  stk raudlauk

olivenolje

salt

kverna pepar

TILBEHØR

asparges

potet

FRAMGANGSMÅTE

Set steikeomnen på 180 °C. Skjer torsken i jamnstore stykke og dryss dei med salt, og la dei ligge i ca. 20 minutt. Skyl saltet av og tørk stykka med tørkepapir. Legg dei i ei eldfast form.

PESTO

Bland saman alt unntatt oljen og kjør det til ein jamn mos i foodprosessor eller med ein stavmiksar. Spe med olje til ein glatt puré. Smak til med salt og pepar. Smør pestoen over torsken og bak i steikeomnen i ca. 12 minutt eller til den er ferdig.

BACONDADLER

Skjer baconskivene i to. Rull bacon rundt dadlane, fest med tannpirkarar og steik rullane i smør til baconet er sprøtt.

TOMATSALAT

Skjer tomat i skiver og finhakk raudlauk. Ha over litt olje, salt og pepar.

Server den omnsbakte torsken på varme tallerkar med bacondadlar, tomatsalat, dampa asparges og kokte poteter.

Smaken av haust med steikt uer og kantarellfrikassé

Haust er sopptid og å plukke sopp er som å gå på skattejakt i skogen, lykkefølelsen er stor når ein finn kantarell eller skogens gull! Den einaste soppen eg er heilt trygg på er nemlig kantarell, så denne vågar eg å plukke aleine utan å ha med soppekspert.  

Kantarell er Norges beste og mest gjenkjennelige matsopp. Ein ekte kantarell har eggegul både hatt og stilk, hatten er traktforma og glatt på oversida og med bølgete gaffelgreina ribbar på undersida. Det viktigaste av alt, ingen giftige soppar liknar på kantarell.

Sopp skal ikkje vaskast, men børstast rein for jord, og all sopp skal varmebehandlast før bruk. Steik soppen i varm panne med litt smør eller nøytral olje til du får ein fin brunfarge på deler av soppen. Kantarell smakar lett krydra, med peparliknande ettersmak, aromaen i frikasséen er knallgod til all slags steik steikt fisk. Dette er smaken av haust!

HAUST: Smaken av haust med steikt uer og kantarellfrikassé. Foto: Norges Sjømatråd, Marianne Aaronsen.

 INGREDIENSAR til 4 porsjonar:

800 g uerfilet, med skinn

(eller anna fisk, torsk, sei, laks)

1 ss olivenolje

1 ss smør

salt og pepar

FRIKASSÉ

250 g kantarellar

1 stk sjalottlauk

0.5 fedd kvitlauk

1 ss olivenolje

1 ss smør

2 dl matfløyte

½ sitron

2 ss frisk persille

salt og pepar

TILBEHØR

Potet

FRAMGANGSMÅTE

Skrap skjela av ueren med ein skarp kniv.  Skyl og tørk filetane godt med tørkepapir. Dryss fisken med salt og pepar, og brun den i olivenolje på begge sider. Skru ned varmen, tilsett smør og steik fisken ferdig, 1-2 minutt på kvar side.

FRIKASSÉ

Reinsk og skjer kantarellar i bitar, og finhakk sjalottlauk og kvitlauk. Steik kantarellar gylne i olje, tilsett smør, sjalottlauk og kvitlauk, og la massen surre i nokre minutt. Slå på matfløyte og la den koke inn til det halve. Smak til med safta av sitron, salt og pepar. Rør inn hakka persille rett før servering. Server ueren med kantarellfrikasséen og kokte poteter.

Kjære mamma, takk for seibiff med lauk!

Seibiff med lauk må vere ein av verdast beste middagar, den har følgt meg heile livet og retten går aldri av moten i mi matverd. Pappa hadde båt og var ivrig hobbyfiskar med både dorg og garn på Ørstafjorden. Fisk var viktig matauk til ei stor familie på 60 og 70 talet.  

Mamma styrte kjøkkenet heime og av fangsten laga ho fiskekaker, fiskebollar, fiskegrateng, kokt-, lettsalta-, og steikt fisk. Eg kan ikkje hugse at vi sa at vi ikkje likte fisk og spesielt når seibiff med lauk sto på middagsbordet, då vart det fort tomt i panna.

Dagens oppskrift på denne herlige retten er litt modernisert. For det første legg ein rett og slett legg fiskestykka ei lita stund i saltlake før panering og steiking, dette gjer fiskestykka litt fastare. Det andre er at retten består av heile fem ulike lauktypar, ei skikkelig smaksbombe av lauksmakar. I dag fyller mamma 88 år, takk for alle den gode maten og gratulerer med dagen!

SEIBIFF: Ein av verdens beste middagar, seibiff med lauk og remulade. Foto: Norges Sjømatråd, Marianne Aaronsen.

 INGREDIENSAR til 4 porsjonar:

800 g seifilet, utan skinn og bein

100 g salt

1 dl kveitemjøl

Smør

LAUKBLANDING

4 stk sylta sølvlauk

4 stk sjalottlauk

1 stk lauk

1 stk purrelauk

1 bunt graslauk

4 ss smør

1 ts sukker

½ sitron

salt og pepar

REMULADE

2 dl majones

1 dl rømme

2 stk ansjosfilet

2 ts kapers

1 ss sylteagurk

½ sjalottløk

1 ss frisk persille

salt og pepar

sitronsaft

TILBEHØR

Potet

FRAMGANGSMÅTE

Skjer seien i serveringsstykke. Rør saman kaldt vatn og salt, og la fiskestykkene ligge i saltlaken i ca. 10 minutt. Ta fiskestykka opp og tørk dei godt med tørkepapir. Vend stykka i kveitemjøl, rist av overflødig mjøl og brun dei i smør i ca. 2 minutt på kvar side.

LAUKBLANDING

Skjer lauk, raudlauk, sjalottlauk, purre og graslauk i tynne skiver. La sølvlauken vere heil. Brun all lauken i smør, tilsett sukker. Tilsett sitronsaft og skal frå sitron og la det surre til det blir mjukt. Smak til med salt og pepar.

REMULADE

Finhakk ansjosfilet, kapers, sylteagurk, sjalottlauk og persille. Rør saman ingrediensane til remuladen og smak til med salt, pepar og nokre dråpar sitronsaft.

Server seibiffen med lauk, remulade og kokte poteter.

Grilla laks med mangosalat er enkel, rask og sunn middag

Ferien er over og det er klart for skulestart. Gode kvardagsrutiner skal etablerast og raske, enkle og sunne middagsrettar er ettertrakta når kvardagen innhentar oss. Sjømatkonsumet blant barn og unge er framleis for lågt og Helsedirektoratet sitt kosthaldsråd gjeld framleis, nemlig å velje fisk til middag to til tre gongar per veke.

Ein fiskemiddag kan ein gjere meir spanande med nytt tilbehør og mango er skikkelig godt som middagstilbehør. Mango er ei frukt som stammar frå India og den har søt, tropisk aroma. Mango finn ein i alle fruktdiskar i Norge i dag, og den spesielle kraftige mangosmaken i salaten gjer måltidet til ein smaksfest. Visste du forresten at mango er ei av dei mest etne fruktene i verda etter banan?

Laks er populært, lett tilgjengelig og mange likar smaken. Feit fisk er dessutan vår beste kjelde til omega-3 feittsyrer og vitamin D, og saman med mango som er full av C vitamin, er denne middagen ei vitaminbombe i seg sjølv. God middag!

LAKS: Grilla laks med mangosalat er enkel, rask og sunn middag! Foto: Norges Sjømatråd, Astrid Hals.

INGREDIENSAR

700 g laksefilet, utan skinn og bein

2 ss olivenolje

salt og pepar

MANGOSALAT

1 stk mango

1 potte frisk koriander

1 stk raud chili

4 ss olivenolje

½  stk lime

salt og pepar

FRAMGANGSMÅTE

Skjer laks i serveringsstykke og pensle dei med olivenolje. Grill laksestykka i ca. 2 minutt på kvar side og krydre med salt og pepar.

MANGOSALAT

Skjer mango i bitar. Plukk blada av korianderplanta, og skjer chili i små bitar. Bland mango, korianderblad og chili med olivenolje og limesaft. Smak til med salt og pepar.

Server grilla laks med ris og mangosalat ved sidan av.

Grilla klippfisk med brokkolisalat og nypotet er perfekt sommarmat!

Klippfisk er velsmakande og virkelig nydelig på grillen, den er også enklare å få godt til på grillen enn anna fisk sidan den er fast i fiskekjøtet.

Når ein skal bruke klippfisk er det viktig å planlegge måltidet. Klippfisk er veldig salt så den må vatnast ut i minst eit døgn før bruk, og ein bør skifte vatn i alle fall to gongar. For å spare tid kan ein også få kjøpt ferdigutvatna klippfisk i butikken, denne er klar for varmebehandling med ein gong.

For perfekt grilling er det viktig å sørge for å ha ei varm sone og ei litt kaldere sone på grillen, slik at du får bytta mellom direkte og indirekte varme. Dei ferdig grilla fiskestykka skal penslast med marinade og bør ligge å kvile på den indirekte varmen før servering.

Grilla klippfisk saman med knasande sprø brokkolisalat med søte rosiner og nøtteaktige pinjerkjerner blanda i syrlig creme fraise gjer at du får mange gode smakar i munnen; salt, søtt og surt. Saman med nypoteter på grillspyd kjem smakslaukane til å fryde seg!

GRILLFAVORITT: Grilla klippfisk med brokkolisalat og nypotet er perfekt sommarmat! Foto: Norges Sjømatråd, Astrid Hals.

INGREDIENSAR

800 g utvatna klippfisk utan skinn

MARINADE

7-8  skiver raud chili

½ stk sitron

4 ss olivenolje

½  ss sesamolje

SALAT

1 stk brokkoli

1 stk raudlauk

2 dl rosiner

100 g rista pinjekjerner

3 dl creme fraise

1 ss honning

2 ss kvitvinseddik

salt og pepar

TILBEHØR

nypotet

grillspyd

olivenolje

FRAMGANGSMÅTE

Varm grillen. Legg klippfisk på grillen og grill den eine sida 3-4 minutt på sterk varme. Pensle sida som vender opp med marinaden og la fisken ligge på indirekte varme i 4-5 minutt, til det piplar veske fra sida og fileten startar å flake seg.

MARINADE

Finhakk chili, riv skalet og press safta av sitronen. Bland chili, sitronskal- og saft, olivenolje og sesamolje godt saman.

SALAT

Del brokkoli i små bukettar og finhakk raudlauk. Bland brokkoli, raudlauk, rista pinjekjerner og rosiner saman i en stor skål. Lag ein dressing av å blande saman creme fraise, honning og kvitvinseddik. Vend dressingen i salaten, og smak til med salt og pepar.

TILBEHØR

Kok nypotet møre med skalet på i lettsalta vatn i 15-20 minutt. Tre dei på eit grillspyd og pensle med litt olivenolje. Grill potetspyda raskt på grillen slik at dei får ein liten grillsmak.

Tips: Start med marinaden, slik at den er klar til pensling når fisken skal grillast.

Sprøsteikt og grilla makrell med sommarsalat er ypperlig sommarmat!

Makrellen har ikkje svømmeblære i ryggen og sym derfor heile livet utan stans, dette gjer fiskekjøtet spenstig og næringsrikt. Makrellen vandrar langs kysten vår i Sør-Noreg og samlar seg i gigantstimar som kan vere så store som ni kilometer lange og fire kilometer breie. Kjenneteikn på makrellen er stilige tigerliknande striper som glitrar med svartgrøn fagre og kvit buk, det er kun makrellen som har slike striper i vårt farvatn.

For ein hobbyfiskarar kan det vere stor lykke å kome borti ein makrellstrim, det kan ende med storfangst! Får du en makrell på kroken i juli-august er den garantert full av omega 3-feittsyrer, vitamin D og B12. Makrell er med andre ord ein veldig god og sunn fisk.

Små makrell kallast pir og kan grillast heile, men makrellen må steikast på begge sider. La alltid makrellen ligge litt lenger enn du trur, då får skinnet bli skikkelig steikt først. Skjer eit par lette snitt på kvar side av fisken før du grillar den, då får du ei fin og sprø steikeskorpe som ser lekker oppå sommarsalaten. Makrellen er eit sikkert sommarteikn, nyt den no!

MAKRELL: Sprøsteikt og grilla makrell med sommarsalat er ypperlig sommarmat! Foto: Norges Sjømatråd, Astrid Hals.

INGREDIENSAR

750 g makrellfilet

salt og pepar

olje

SALAT

1 stk tomat

12 stk reddik

½ agurk

1 ss frist graslauk

1 dl baconost

1 dl lettrømme

mjølk

salt og pepar

TILBEHØR

Brød

FRAMGANGSMÅTE

Skjer makrell i serveringsstykke og dryss på salt og pepar. Pensle stykka med olje og grill dei ca. 2 minutt på kvar side.

SALAT

Skjer tomat i tynne båtar, reddik og agurk i tynne skiver. Bland saman grønsakene og finhakket graslauk. Pisk saman baconost og lettrømme, og spe med litt mjølk til det blir ein fyldig dressing. Smak til med salt og pepar, og slå dressingen over salaten. Server nysteikt makrell med sommarsalat og brød ved sidan av.

Sommarfest med kamskjel, kvitlauk og asparges!

Er du på jakt etter ein sommarleg forrett, eller kanskje du rett og slett leitar etter rask smårett som du kan nyte i skuggen? Då vil eg foreslå denne helgas rett som er ein sommarfest i seg sjølv. Råvara er kamskjel og det er noko av det edlaste og vakraste vi kan få opp frå havet.

Kamskjel vert fanga langs kysten vår frå Trøndelag til Nordland og det er oftast dykkarar som plukkar denne eksklusive råvara opp frå havet. Kamskjela er ei etterspurt delikatesse som ein kan vere heldig å finne levande med skal i ferskvaredisken, men oftast vi finn dei frosne utan skal i frysedisken.

Forma på kamskjel er karakteristisk med eit flatt overskal og eit bua underskal. Skala er gul- eller raudbrune og har 15 – 17 ribbar, og denne vakre skalvifta fungerer perfekt som fat til retten. Det kan vere smart å ta vare på slike sjel dersom du er heldig å få ta i levande skjel, då har du til både fat og bordpynt neste gong du vil lage denne smakfulle sjømatretten!

SOMMARFEST: Vakre og smakfulle kamskjel er ypperlig til forrett eller smårett. Foto: Norges Sjømatråd, Marianne Aaronsen.

INGREDIENSAR

12 stk kamskjel

12 stk asparges

sukker

salt

MARINADE

1 stk raud chili

2 fedd kvitlauk

1 dl solsikkeolje

½ dl vatn

SAUS

2 dl matfløyte

2 ss smør

salt og pepar

TILBEHØR

Salat

FRAMGANGSMÅTE

Brukar du ferske kamskjel starter du med å opne og reinske skjella. Frosne kamskjel legg ein i ein bolle og tinar dei i kjøleskap og let dei renne av seg på tørkepapir. Kok opp vatn med litt sukker og salt. Legg i asparges og la dei koke i ca. 1-2 minutt.

MARINADE

Finhakk chili og kvitlauk, og rør saman med solsikkeolje og vatn. La kamskjella liggje i  marinaden i minst ein time. Ta kamskjella opp av marinaden og la de renne av seg på tørkepapir. Ta vare på marinaden til du skal lage saus.

Steik kamskjella raskt i steikepanne eller på grill, ca. 30 sekunder på kvar side.

SAUS

Slå marinaden over i ein lita gryte og kok den inn til det halve. Tilsett matfløyte og la den koke litt. Pisk smør inn rett før servering og smak til med salt og pepar. Server steikte kamskjel med saus over, og asparges og salat ved sidan av.