Lutefisk Amor med aprikos- og chorizosmør

Det er ei tid for alt er det noko som heiter, for etter 7 år med heile 176 matspalter om fisk og sjømat i Møre Nytt og Vikebladet er det på tide å takke for oppdraget. Eg har meiska meg i gode oppskrifter frå Norges sjømatråd og fått formidla kvar einaste matspalte med stor glede!

Eg vil avslutte med noko av det beste eg får servert nemleg lutefisk. Tenk at lutefisken er ein rett som generasjon etter generasjon har satt på bordet i julehelga. I dag startar lutefiksesongen i allereie oktober, så det er altså lov til å tjuvstarte på lutefisken no.

Lutefisk Amor har ein nydeleg vri som det er lett å forelske seg i, for den er toppa med lekkert aprikos- og chorizosmør. Berre fargen er eit syn og her får du også smaken av søtt og salt saman. Lutefisk Amor er rett og slett himmelsk godt!

LUTEFISK: Lutefisk Amor med aprikos- og chorizosmør. Foto: Norges sjømatråd.

Ingrediensar ( 4porsj)

2 kg lutefisk

flaksalt

 

Ertepuré

400 g frosne erter

50 g smør

salt og pepar

 

Smørsaus

150 g chorizopølse

4 tørka aprikos

50 g smør

2 ss olivenolje

1 bunt grasløk

Tilbehøyr

8 poteter

Framgangsmåte

Del lutefisken i porsjonsstykke, berekne to gode bitar per person. Legg fiskestykka med skinnsida ned i ei langpanne eller eldfast form. Dryss over godt med knust flaksalt og la fisken ligge slik i 30 minutt.

Dekk forma med aluminiumsfolie. Klem godt rundt kantane slik at det er tett. Bak fisken ved 200 grader i ca. 30 min., avhengig av tjukkelsen på fiskestykka. La fiskestykka renne godt av seg før servering.

Ertepuré

Kok opp erter med litt vatn og ei klype salt. Slå av vatnet og køyr ertene saman med smør i ein hurtigmiksar til jamn puré. Ha pureen tilbake i kasserollen, smak til med salt og pepar og hald den varm.

Chorizo- og aprikossmør

Skjer chorizopølse og aprikos i små bitar. Fres pølsebitane i olivenolje, og la det syde slik at pølsa gir frå seg både smak og farge. Tilsett hakka aprikos og smør, la det syde videre i eit par minutt.  Tilsett hakka urter rett før servering. 

Server lutefisken rykande varm med grøn ertepure, chorizosmør og kokte poteter.

 

Møt hausten med grilla laks og blåbærmarinert byggris

Plask, plask - det regnar ute og hausten har kome med sine gyldne fargar og sterke stormar. Tida er også komen for meir innekos med fyr i omnen og god mat i grytene. Det er lov å kroe seg mett og god på sofaen etter middag for å kvile seg litt og nyte årstida.

Av og til er det tilbehøyret som får ein rett til å skine, og akkurat slik er det med blåbærmarinert byggris. Byggris har vorte svært populært dei siste åra som er sunnare erstatning for ris eller pasta.

Ein seier at byggris er bra for både kloden og kroppen. Bygg har faktisk lavast karbonavtrykk mellom korntypane og er kortreist mat i Norge. Helsemessig har bygg høgt innhald av betaglukanar som kan redusere kolesterolinnhaldet i blodet, stabilisere blodsukkeret og forbetre tarmfunksjonen.

Denne retten er vinn-vinn på alle plan, og på kjøpet både ser den god ut og smakar godt!

LAKS: Møt hausten med grilla laks og blåbærmarinert byggris. Foto: Marianne Aaronsen, Norges sjømatråd

600 g laksefilet

salt og pepar

olje

grillfolie

 

Byggris

1/2 dl byggris

2 dl blåbær

1 vårløk

2 ss bringebæreddik

1 dl olivenolje

salt og pepar

Dressing

1 dl frisk kruspersille

1 dl crème fraîche

½ ts bringebæreddik

sukker

Server med

200 g blanda salat

Framgangsmåte

Skjer laksen i porsjonsstykke og dryss med salt og pepar. Legg laksen på eit stykke smurt grillfolie og grill den i ca. 2 minutt på kvar side.

Byggris

Kok byggris etter oppskrifta på pakken og avkjøl den. Knus halvparten av blåbæra og finhakk vårløk. Bland knuste blåbær og bringebæreddik i ein bolle og pisk inn olivenoljen litt om gangen. Tilsett byggris, heile blåbær og vårløk, og smak til med salt og pepar.

Dressing

Finhakk persille og rør saman med crème fraîche og bringebæreddik. Smak til med litt sukker om nødvendig.

Server grilla laks med byggris, dressing og frisk salat ved sidan av.

Tips: Byggris kan fint bytast ut med middagsbygg. Om du ikkje har friske blåbær kan du bruke fryste.

 

 

Oh-là- là kamskjell med chili, kvitløk og asparges er lekkert!

Oh- la -la eller du store min kan ein utrykke på fransk med beundrande begeistring berre ved synet av kamskjel sin ytre utsjånad, og ikkje minst også når ein smakar på denne delikatessa av sjømat!

Kamskjel er perfekt saman med fersk asparges. Eit tips til reinskinga av aspargesen er å kutte eller knekke vekk den trevlete delen, der det grøne går over i kvit-lilla, cirka 2-3 centimeter opp fra botnen. Om du ønsker å skrelle aspargesen, kan du gjere det.

I denne oppskrifta kombinerer ein steikte kamskjel med litt sterk smak av chili og kvitløk saman med mild smak av asparges. Retten er rask å lage til: Voilà  eller sjå der eller vips – retten er klar for servering!

KAMSKJEL: Oh-là- là kamskjell med chili, kvitløk og asparges er lekkert! Foto: Marianne Aaronsen, Norges sjømatråd. 

Ingrediensar (4 personar)

12 kamskjel

12 asparges

sukker

salt

 

Marinade

1 raud chili

2 fedd kvitløk

1 dl solsikkeolje

½ dl vatn

 

Saus

2 dl matfløyte

2 ss smør

salt og pepar

 

Server med

Salat

 

Framgangsmåte

Brukar du ferske kamskjel startar du med å opne og reinske skjela. Fryste kamskjel legg du i ein bolle, let dei tine i kjøleskap og renne av seg på tørkepapir. Kok opp vatn med litt sukker og salt. Legg i reinska asparges og la dei koke i ca. 1-2 minutt.

Marinade

Finhakk chili og kvitløk, og rør saman med solsikkeolje og vatn. La kamskjela ligge i marinaden minst 1 time. Ta kamskjela opp av marinaden og la dei renne av seg på tørkepapir. Ta vare på marinaden til du skal lage saus. Steik kamskjela raskt i steikepanne eller på grill, ca. 30 sekunder på kvar side.

Saus

Slå marinaden over i ein liten kasserolle og kok den inn til det halve. Tilsett matfløyte og la den koke litt. Pisk smør inn rett før servering og smak til med salt og pepar.

Server steikte kamskjel med saus over, og asparges og salat ved sidan av.

 

Krabbe naturell er haustens delikatesse!

Å lære om livet i havet er spennande, og for min del starta det allereie i Barnas Vel i 1970. Der fekk me ungane høyre fortellingane og lytte til songane frå Taremareby av Ingebrikt Davik, eit eventyrleg undervassamfunn med skaldyr, fisk og planter.

Vi blei kjent med Kong Kveites datter, Reke Rikke, Lakse Lars, Flyndrefrøken Fin og ikkje minst den vonde Krabbekrølle. Krabbekrølle sitt må er å overta makta i havrike, men sjølvsagt som i alle eventyr var der ein modig Flyndrefant som redda Flyndrefrøken Fin frå Krabbekrølle si maktsjuke.

Dette vart haustens barndomsmimring frå meg, men no må eventyr til sides og matprat vere tema. Krabbe naturell og kokt krabbekjøt smakar friskt av hav og er ein av dei mest fantastiske rettane ein kan servere - dette er rett og slett haustens delikatesse!

KRABBE: Krabbe naturell er haustens delikatesse! Foto: Kim Holthe, Norges sjømatråd.

Ingrediensar til 4 pers

4 stk krabbe

loff

majones

2 sitronar

pepar

 

Framgangsmåte

Dersom du kjøper levende krabbe, må den kokast først. Krabbe kan serverast naturell, slik som den er, men ein kan også reinske den før servering. Fjerne paven, gjelane og knekke klørne med ein nøtteknekkar. Legg krabbekjøttet tilbake i skalet så krabba ser heil ut før du serverer den.

Server krabbe naturell med loff, smør, majones og sitronbåtar, med pepar på bordet.

Tips: Som variasjon i tilbehøyret kan du servere chilisaus til.

Fiskekake i pitabrød er eit godt matpakketips!

No er kvardagen tilbake og det er full fart med skule og arbeidsliv. Vi må sjølvsagt huske å ta med matpakken vår, og matboksar, mat- og mellomleggspapir som ligg i kjøkkenskuffa må vere klar til bruk og kunne fyllast og pakkast til medbrakt lunsj.

Visste du at vår matpakke i dag er ein modell av Oslofrukosten som vart innført av Oslos skulelegesjef Carl Schiøtz i 1929? Oslofrukosten bestod av ein halv liter mjølk, to små kneippkavringar eller knekkebrød med margarin og mysost, grovt kneippbrød med margarin og pålegg, for eksempel ost og torskeleverpostei, eit halvt eple eller ein halv appelsin eller 100 gram gulrot eller kålrot, og ei teskei tran dagleg i vintermånadane.

Oslofrukosten er altså årsaka til at vi i Noreg et eit kaldt måltid til lunsj i motsetning til Sverige, Finland og mange andre land i verda. Vi nordmenn elskar matpakkane våre, og ein kollega uttrykte ein gong at to brødskiver med litt sveitt brunost alltid smakar godt når klokka er 11.30 på ein kvardag.

Treng du litt variasjon i matpakken din er det supert å legge fiskekaker eller fiskepudding mellom to brødskiver, eit hamburgerbrød eller pitabrød. Husk alltid å velge noko grønt som til!

MATPAKKE: Fiskekake i pitabrød er eit godt matpakketips! Foto: Synøve Dreyer, Norges Sjømatråd.

Ingrediensar:

Fiskekaker eller fiskepudding

Pitabrød, hamburgerbrød eller brødskiver

Salat, avocado, agurk, dressing etc.

Nyt laks sashimi med ingefærponzu

Japansk matkultur har kome til Norge for å bli, og mange elskar den friske smaken av sashimi. Sashimi tynne skiver eller bitar av rå fisk eller anna sjømat som serverast med for eksempelt wasabi, skiva reddik, sylta ingefær, sylta raudløk og sjølvsagt soyasaus.

Den enkle soyasausen kan med fordel forvandlast til ein smakfull ponzusaus, som er soyasaus tilsett litt søtt, litt surt, nøttesmaken av sesamolje og fersk ingefær som kan brenne litt på tunga. Ponzosaus  saman sashimi er litt av ein smakseksplosjon i munnen.

Denne retten kan brukast som forrett, lunsj eller berre ein koserett når ein er «litt fysen» om kvelden!

LAKS: Nyt laks sashimi med ingefærponzu. Foto: Josefin Linder. Norges sjømatråd.

400 g laksefilet, utan skinn og bein

2 avokado

2 ss sesamfrø

2 ss karse

 

Sylta raudløk

1 raudløk

½ dl 7% eddik

1 dl sukker

1 ½ dl vatn

 

Ponzusaus

1 dl soyasaus

1 ½ lime

1 ts sukker

1 ts sesamolje

2 cm ferske, riven Ingefær

 

Framgangsmåte

Sørg for at laksen er av høg kvalitet og bruk gjerne loins. Sørg for at laksen er fersk, eller at den har vært fryst i minimum 24 timar. Skjer raudløken i skiver. Kok opp vatn, sukker, eddik, og ha i løken. La den kjøle seg ned i laken (best om den er laga dagen før). Bland saman ingrediensane til ponzusausen. Skjer laksen i tynne skive, og avokado i passande bitar. Dander dette saman med sylta raudløk, og dryss over rista sesamfrø og karse. Server ingefærponzu ved sidan av.

 

Grilla breiflabb med tandoorismak er luksus!

Breiflabb er også kjent som marulk, flabb, ulke, sjødjevel, havtaske og storkjeft, den ser skrekkinngytande ut og var tidlegare kjent som «ufisk». Ufisk er eit uttrykk brukt om fiskeslag som ikkje blei rekna som god matfisk, men den oppfatninga har endra seg med tida.

I dag er breiflabb ei delikatesse og fiskekjøtet er kvitt, fast, delikat og magert. Det viktigaste å huske på med breiflabb er å tilføre litt feitt undervegs i tillaginga og å varmebehandle den med omhug slik at den ikkje blir seig og tørr.

Breiflabb er fast i kjøtet og dermed enkel å grille. Helgas oppskrift der er indisk inspirert ved at breiflabben er marinert i ein tandoorimarinade og skal serverast med tzatziki og grilla grønsaker. Dette er luksus sommarmat!

BREIFLABB: Grilla breiflabb med tandoorismak er luksus! Foto: Synøve Dreyer, Norges sjømatråd.

Ingrediensar (4 porsj)

800 g breiflabbfilet

2 ss frisk koriander

2 dl naturell yoghurt

3 ts tandoori masala

1 ts gurkemeie

½ ts kajennepepar

grillspyd

olivenolje

 

Grønsaksspyd

12stkpotet, amandine

1stkpaprika, rød

1stkpaprika, gul

1stkpaprika, grønn

1stkrødløk

Olivenolje

 

Tzatziki

½ agurk

1 fedd kvitløk

2 ss frisk mynte

½ stk sitron

2 dl naturell yoghurt

olivenolje

salt og pepar

 

Framgangsmåte

Varm grillen. Skjer breiflabb i bitar på ca. 3x3 cm. Grovhakk koriander og bland det saman med yoghurt. Rør inn tandoori masala, gurkemeie og kajennepepar. Snu inn breiflabb i marinaden og la den marinere i minst 15 minutt. Tre breiflabbitane på grillspyd og pensle lett med olivenolje. Grill breiflabbspyda på direkte varme og snu spyda når du kjenner at dei løsnar. La det grille i ca. 10-15 minutt til saman.

Grønnsaksspyd

Kok potet i 10-15 minutt. Skjer paprika og raudløk i store bitar. Tre potet og grønsaker på grillspyd, og pensle med olivenolje. Grill først på direkte varme i fem minutt og legg dei så over på indirekte varme i 10 minutt.

Tzatziki

Riv agurk, finhakk kvitløk og mynte, og press safta frå sitronen. Ha agurken i eit kaffefilter og press forsiktig ut agurkvatnet ved å trykke lett rundt filteret. Bland saman agurk, kvitløk, mynte og yoghurt, og smak til med sitronsaft, olivenolje, salt og pepar.

Server breiflabb med grønsaksspyd og tzatziki.

Tips: Brukar du trespyd må disse ligge i vatn i 30 minutt før du bruker dei.

Grilla teriyaki-makrell er sommarsnadder

Grilla fisk smakar fantastisk godt, men mange syns det er vanskeleg dersom fisken blir tørr eller set seg fast i rista. Val av fisk på grillen betyr også noko for resultatet. Laks, aure og makrell er eksempel på fisk som endrar farge når dei er klare, så dersom du er fersk på grilling av fisk anbefalast disse.

Her kjem sju enkle tips for å lykkast med fisk på grillen.

•         Start med ein rein grill
•         Pensle fisken med litt nøytral olje først
•         Sørg for at grillen er supervarm når du startar
•         Lær deg skilnaden på direkte og indirekte varme
•         Klargjer alt før du startar å grille
•      Bruk gjerne aluminiumsfolie dersom du ikkje ønsker å legge fisken rett på grillen

Makrell er nydeleg sommarmat og perfekt på grillen! Makrell med frisk japansk-inspirert teriyaki-saus oppå, råkostsalat og nypotet ved sidan av er perfekt å servere i grillselskap!

MAKRELL: Grilla teriyaki-makrell er sommarsnadder. Foto: Morten Sjøvik, Norges sjømatråd

Ingrediensar (4 porsj)

8 ss soyasaus

3 ss finhakka kvitløk

1 ss riven ingefær

3 ss eplecidereddik

3 ss brunt sukker

2 ss sesamolje

1 lime

Pepar

 

Råkost

1 spisskål

2 gulrot

6 reddikar

limesaft

salt

frisk koriander

 

Framgangsmåte

Ha alle ingrediensane til sausen i eit høgt glas eller eit litermål, køyr godt saman med stavmiksar slik at alt blandast godt. Sausen slåast så over i ei gryte og kokast på medium varme til den tjuknar. La den kjøle seg litt før bruk.

Hovudkål og gulrøter strimlast tynt og blandast godt saman. Reddikar høvlast tynt og vendast inn saman med kål og gulrøter. Rett før servering smakast grønsakene til med salt og limesaft.

Makrellfiletane tørkast godt på kjøkenpapir og penslast med olje på skinnet, grillast så på varm grill med lok til makrellen er nesten ferdig. Mot slutten penslast fisken med teryiakisausen. Legg så på loket igjen. Etter rundt eitt minutt er fisken klar.

Legg opp fisken og slå over litt meir saus, server med råkost og topp med korianderblad.

Tips:

Makrellen kan også steikast med litt olje i ei panne på ein regnversdag. Filetane skal steikast på begge sidene til dei blir gyllenbrune. Eit kjøkentips er å gi makrellen romtemperatur for å unngå at den krøllar seg under steiking.

 

Spekesild og nypotet er nydeleg sommarmat!

Denne matspalta er til ære for min tidlegare kollega og gode ven Anders Roald. Han er ein ivrig lesar og kritikar av matspalta mi. Av han har eg lært at eg ikkje treng å skrive lauk men løk på nynorsk og at Matjessild nærmast er umogleg å få tak i her på sunnmøre, han har sjølvsagt rett!

No vågar eg meg ut på glasisen igjen med ein silderett, for helgas rett er tysk og heiter eigentleg «Matjes nach Hausfrauenart». Eg må skunde meg å seie at ein kan erstatte matjessild med både spekesild og kryddersild i denne oppskrifta.

I Sverige får ein kjøpt Matjessild overalt, her i Norge finnast den i utvalde matbutikkar som Jacobs i Oslo og sjølvsagt på IKEA. I sommar skal eg til Sverige og det vert personleg matjessild leveranse fram til Vatne etter ferien. Eg ønsker alle mine lesarar og spesielt til Anders ein riktig god sommar!

SILD: Spekesild og nypotet er nydeleg sommarmat! Foto: Morten Sjøvik, Norges sjømatråd.

8 fileter sild (matjessild, spekesild eller kryddersild)

1 rødløk

1 eple

8 småsylteagurk

100 g rømme

50 g majones

heil svart pepar

3 cm peparrot

200 g nypotet

 

Framgangsmåte

Kok nypotet. Dersom silda er veldig salt eller krydra, kan du skyle den kort under kaldt rennande vatn, eller legge den i vatn/mjølk i nokre timar. Legg deretter filetane på eit kjøkkenhandklede/tørkepapir, la dei tørke litt og kutt dei opp i mindre bitar. Skjer raudløken i tynne ringer, vask eplet og del det i fire ved hjelp av en kniv. Del kvar av de fire bitane i tynne skiver på langs. Kutt opp sylteagurken i terningar. Rør rømmen og majonesen saman i ein bolle og smak til med fersk riven peparrot og pepar. Legg opp som en salat på fire tallerkenar eller på eit stort fat. Start med å legge potetene i botnen, fordel deretter eple, løk, sylteagurk og sildebitar over potetene. Legg til slutt på rømmesausen, pynt med dill og riv over peparrot.

Skattekiste fylt med grilla sei i folie

Hipp hurra for sommaren og grillsesongen er absolutt i full gong! Typisk norsk grillmat er ofte prega av å innehalde kjøt og pølser, men å grille fisk og sjømat er eit ypparleg alternativ.

Å grille fisk er både raskt, enkelt og godt. Noko av det enklaste ein kan legge på grillen er grillpakkar fylt med ulik fisk, skaldyr, urter og grønsaker. Det er ein fin sosial aktivitet at middagsgjestane kan få tilpasse grillpakken etter sine eigne preferansar.

Om du likevel vil ha eit tips til samansetting i grillpakken kan du prøve Grilla sei i folie. Dette er rett og slett ei skattekiste med smaken av urter, chili og sitrongras og saman med steikte nypotet vert smaken av sommar på tallerkenen!

SEI: Skattekiste fylt med grilla sei i folie. Foto: Synøve Dreyer, Norges sjømatråd.

1 kg seifilet, utan skinn og bein

2 ts salt

500 g nypotet

1 ts korianderfrø

1 stk lime

1 stk raud chili

1 stk sitrongras

2 ss frisk mynte

2 ss honning

2 ss frisk koriander

olje

aluminiumsfolie

 

Salat

2 stk salat

2 dl frisk bladpersille

1 raudløk

1 agurk

2  eple

 

Dressing

50 g hasselnøtter

3 ss honning

6 ss eplecidereddik

6 ss olivenolje

salt

grovmalt pepar

sesamolje

 

Framgangsmåte

Dryss salt på seifilet og la den kvile i ca. 10 minutt. Kok nypotet til dei er nesten møre, avkjøl og skjer dei i tykke skiver. Legg seien på eit stykke aluminiumsfolie smurt med olje og dryss over korianderfrø. Riv skal og press saft av lime, finhakk chili, sitrongras og mynte. Bland skal og saft av lime med chili, sitrongras og mynte, og smør blandinga over seien. Brett aluminiumsfolien rundt seien og grill den ca. 15 minutt, under lok dersom grillen har det. Pensle potetene med litt olje og grill dei på begge sider. Opne aluminiumsfolien med sei og dryss finhakka koriander over før servering.

Salat

Riv salat og grovhakk bladpersille. Finhakk raudløk, og skjer agurk og eple i terningar.

Dressing

Grovhakk hasselnøtter, og bland med honning, eplecidereddik og olivenolje. Smak til dressingen med salt, pepar og litt sesamolje. Bland dressingen forsiktig inn i salaten.

Server grilla sei og potet med salaten ved sidan av.

Fish and chips er ein ekte lekkerbisk!

Kva er ein lekkerbisk? Uttrykket kjem frå tysk språk og er satt saman av lecken (å slikke), og bisschen (ein liten bit). Med andre ord er ein lekkerbisk ein ekte godbit. Det må nemnast at uttrykket også kan brukast om pene ting og menneske.

Fisk and chips er populær hurtigmat frå Storbritannina, men også Irland, Australia, New Zealand, Canada og nokre kystbyar i Norge er kjende for denne retten. Knaskande sprø frityrsteikt torsk, med chips og ein frisk tartarsaus er ein ekte lekkerbisk. Dersom du gjer slik som det står i helgas oppskrift og toppar du retten med ertepuré slik som britane, er det berre seie - nyt eller «enjoy»!

TORSK:  Fish and chips er ein ekte lekkerbisk! Foto: Studio Isidor, Norges sjømatråd.

Ingrediensar (4 porsjonar)

700 g torskefilet

salt og pepar

Frityrrøre

240 g kveitemjøl

1 ts salt

3 ts bakepulver

2 ½ dl vatn

frityrolje

 

Tartarsaus

2 stk eggeplomme

1 ts sitronsaft

1 ts dijonsennep

1 fedd kvitløk

2 dl olje

3 stk sylteagurk

3 ss kapers

salt

Ertepuré

400 g frosne erter

50 g smør

salt og pepar

 

Tilbehøyr

pommes frites og sitronbåtar

 

Framgangsmåte

Tørk torskefileten godt og skjer i ønska stykke. Dryss med salt og pepar.

Frityr

Bland saman kveitemjøl, salt og bakepulver og tilsett iskaldt vatn. Rør saman til en jamn røre og la den så få kvile i kjøleskapet i 20 minutt. Varm frityrolje i ei gryte eller ein frityrkokar til 160 °C. Dypp torskestykka i frityrrøra, og la røren renne litt av. Steik stykka i olje, to og to om gongen. La dei steike i ca. 5 minutt til dei er gylne og sprø. Legg dei over på tørkepapir.

Tartarsaus

Rør eggeplomme saman med sitron, sennep og pressa kvitløk. Spe med olje - litt om gangen, medan du rører heile tida. Rør inn hakka sylteagurk og kapers, og smak til med salt.

Ertepuré

Kok ertene og slå av vatnet. Ha smøret i ertene og køyr til ein puré med en hurtigmiksar. Varm opp i ei kasserolle og smak til med salt og pepar.

Servering

Server den frityrsteikte torsken med varm ertepuré, pommes frites, tartarsaus og sitronbåtar.

 

 

Matjestartar med eple og dill

Matjesild er ein spesialitet frå Nederland og er modna sild. Reinska sild vert salta og modna i tønner, og dersom den er fanga i mai eller juni når silda er feitast (minst 16%)  kallast den på nederlandsk «Hollandse Nieuwe». Matjesild eller Maatjessharing på nederlandsk, betyr jomfrusild.

Jomfrusild er nett kjønnsmoden og har endå ikkje rukke å utvikle mjølke eller rogn. Silda er altså ung, feit og struttande sunn. Egersund er matjesilda sin hovudstad og når fiskebåtane legg til kai med jomfrusild startar auksjonane der nederlandske oppkjøparar byr om kapp på sesongens delikatesse.

Matjesild brukast til sildepålegg, etast med potet, hardkokt egg og flatbrød, grillast, brukast i wrap og sushi. Matjesildelskarar svergar til Matjesild i lompe og beskriv smaken som ei blanding av hav, sjøkreps, østers og umani. Matjesildtartar er derimot friskt med eple og dill, og du kan bruke retten som ein god forrett eller nydeleg sommarlunsj.

SILD: Matjestartar med eple og dill. Foto: Aina Hole, Norges sjømatråd.

Ingrediensar (4 porsjonar)

4 doble filetar matjessild

1 gul løk

1 eple

1 ts sitronsaft

4 ss crème fraîche

1 ss frisk dill

pepar

 

Server med

grovbrød eller rugbrød

salat

reddik

dill

Framgangsmåte

Hakk matjesfiletane grovt og finhakk løk. Skrell og skjer eple i små terningar. Ha sitronsaft over epleterningane. Bland matjessild, løk, epleterningar, crème fraîche, og finhakka dill. Smak til med pepar. Ha tartaren på skiver av grovt brød eller rugbrød. Server på salat med reddikskiver og dill som pynt.

Tips: Du kan bruke ei lita ringform eller lignande for å forme brødet og tartaren.

 

Møt helga med krema blåskjelsuppe

Ferske blåskjel får ein kjøpt i små 1 kilos nett i ferskvaredisken og det er sesong heile året. Blåskjel kan vere ein rett i seg sjølv , men i helgas oppskrift skal dei brukast i ei krema blåskjelsuppe.

Blåskjeloppdrett finnast langs heile Norskekysten, blåskjel krev inga fòring og er dermed er dei ein av dei mest miljø- og resursvenlege måtane å produsere mat på. Blåskjela et mat med vasstraumen som i all hovudsak er planteplankton.

Det er viktig å vite at alle norske blåskjel er produsert under kontrollerte forhold og dermed trygge å ete. Om du vil plukke blåskjel sjølv må du sjekke på Mattilsynet.no/ blåskjellvarselet. Likevel er det viktig å huske at blåskjel skal vere lukka (levande), tvilsame skjel som er skada eller opne skal kastast. Ingenting varmar så mjukt og godt som krema blåskjelsuppe!

BLÅSKJEL: Møt helga med krema blåskjelsuppe. Foto: Marianne Aaronsen, Norges sjømatråd.

Ingrediensar (4 porsjonar)

1 kg blåskjel

1 gulrot

1 skive sellerirot

2 stilk frisk bladpersille

2 dl tørr kvitvin

3 dl vatn

1 terningfiskebuljong

2 dl kremfløyte

kajennepepar

salt

 

Server med

Godt brød

Framgangsmåte

Skrubb blåskjela og kontroller at alle skjella er lukka. Kast tvilsame skjel. Skjer gulrot og selleri i små terningar. Plukk blada av persillestilkane, ta vare på stilkane og blada. Kok opp vin, vatn og buljongterning, legg i grønsaker, persillestilkar og blåskjel, legg på lok og kok blåskjela til dei opnar seg, ca. 4 minutt. Ta opp skjela med holsleiv og reinsk ut skjelmaten. Mos grønsakene godt i krafta og sil den. Kok opp krafta med kremfløyte og smak til med kajennepepar og salt. Legg blåskjela i suppa. Server suppa i varme suppetallerkenar med hakka bladpersille på toppen og med godt brød ved sidan av.

Tips: Du kan spare nokre av blåskjela og bruke dei som pynt i suppa ved servering.

 

Er du klar for Torsketaco?

Nordmenn elskar texmex og taco har blitt fast innslag på fredagane i norske heimar. Texmex er samansett av matkulturane får Texas og Mexico og denne matkulturen spreidde seg frå grensene ved sørstatane til resten av USA, før den kom til Norge.

I texmex mat brukast ein del søtlege krydder som kardemomme og til forskjell frå meksikansk mat der for eksempel er frisk lime og koriander pregar smaken. Typisk for texmex er også å bruke kveite i tortillane i staden for mais, eller sprøsteike variantar av ulikt forma tacoskjell. Texmex er lett og raskt å lage samtidig som det gir ein god smak som dei aller fleste likar.

Du kan lage ditt eige tacokrydder av chilipulver, kardemomme, spisskummen, salt, kvitløkspulver, malt paprika, malt koriander, oregano, løkpulver og svart pepar. Dette krydderet kan du kan justere til enten mild eller sterk smak, og er du nytenkande nok kan du prøve med torsk som hovudråvare. Det smakar veldig  godt altså, er du klar for Torsketaco?

TORSK: Er du klar for Torsketaco? Foto: Marianne Aaronsen, Norges Sjømatråd.

Ingrediensar

800 g torskefilet

2 ss smør

½  limesaft

salt og pepar

 

Mangosalsa

1 mango

2 anansskiver

1 limesaft

1 raud chili

frisk koriander

 

Tomatsalsa

2 tomat

1 raud chili

1 bunt frisk koriander

½ gul løk

salt og pepar

 

Tilbehøyr

1 raud løk

2 avokado

Salat

 

Server med

250 ml chilimajones

8 tortillalefser

 

 

Framgangsmåte

Strimle hjertesalat, og del raudløk og avocado i fine båtar eller bitar. Lag salsaene. Finhakk alle ingrediensen og bland det godt. La dei stå medan du klargjer fisken. Del torsken i terningar og steik på varm panne med litt smør. Ha over litt limesaft når dei er ferdigsteikt. Strø over salt og pepar. Varm tortillalefsene i omn, steikepanne eller mikrobølgeomn. Smør tortillaene med chilimajones, legg på strimla salat, avocado og løk, torsk, salsa og til slutt hakka koriander.

 

Sennepssild er nydeleg påskepålegg

Å lage heimelaga sildepålegg er for mange ein familietradisjon. Godt sildepålegg til lange påskefrukostar med godt brød, varme rundstykke, kokt egg og nytrekt kaffi er for mange eit høgdepunkt som høyrer til høgtidene.

Klassisk sennepssild med dill på ei stykke rugbrød er rein påskeglede, samtidig er det å endeleg få tid til å ete frukost ilag med familien er samlande i påskedagane. Dette handlar om sosialt samvær, matglede og om å ta seg tid til å ta vare på tradisjonar.

Nokre feirar påska aleine, andre med familien eller venner, medan enkelte er på jobb. Uavhengig av kva ein finn på eller gjer i påskehøgtida kan vi alle kjenne på dei lengre og lysare dagane, dei gode slidrelydar frå takrenna når snøen smeltar og sprudlande fuglekvitter! Ha ei riktig god påske!

SILD: Sennepssild er nydeleg påskepålegg. Foto: Bent Raanes & Sarah Cameron Sørensen, Norges Sjømatråd

Ingrediensar

6 stk kryddersildfilet

½  stk gul løk

 

Sennepssaus

100 g majones

3 ss sennep

2 ss dijonsennep

3 ss frisk dill

1 ts 7% eddik

1 ts sukker

pepar

Fremgangsmåte

Smak på sildefiletane og legg dei i vatn eller mjølk eit par timar dersom dei er for salte. Skjer kryddersildfiletane i bitar og løk i tynne skiver. Bland majones med sennep, dill, eddik og sukker. Smak til med pepar, sukker og eddik. Legg sild og løk lagvis i eit glas eller krukke. Slå sennepssausen over og legg på lok. Silda bør trekke eit døgn i kjøleskap før den etast. Silda er haldbar i kjøleskapet i ca. 1 veke, det vil seie heile påska.

 

Reker er fantastisk godt gjennom heile året

Norges sjømatråd melder at norske forbrukarar elskar ferske reker og at dei forbindast særleg med solfylte sommardagar, men visste du at ferske reker er tilgjengeleg gjennom heile året?

Det gjer ekstra godt å tenke på at norske reker likar seg best i reint kaldt vatn, som gir dei ein frisk smak, fast kjøt og den naturlege lyseraude fargen som gjer dei så freistande.

Reker passar til alle anledningar og spesielt når ein ikkje har god tid til matlaging. Til kvardags kan ein lage Pokebowl reker, Rasta med reker, Reketaco eller Wok med reker.

Til fest kan ein imponere med Toast skagen, Quesedilla med reker, Krema rekesuppe eller ein gamal klassikar som Rekecoctail til forrett.

Når ein kjøper reker i butikk kan forpakningen vise til ulike størrelsar. Størrelsane angir kor mange reker det går på ein kilo. Dersom det for eksempel står «reker 70-90», så går det mellom 70 til 90 reker på en kilo og dette er ein fin middels størrelse på rekene.

Rekefiskarar koker dei største rekene om bord, og dei vert ofte solgt frå fiskebåten ved brygga, eller dei kan frysast ombord. I butikken finnast gode frosne reker og desse er det best å tine sakte i kjøleskap, eller dei kan tinast i  1-2 timar i romtemperatur på kjøkkenbenken.

Om du vil ha reker til kvardag eller fest, til sommar eller vinter så er dei aller best når dei får spele hovudrolle saman med ferskt brød, majones, sitron, toppa med dill og lodderogn.

 

REKER: Ferske reker saman med ferskt brød, majones, sitron, toppa med dill og lodderogn. Foto: Marianne Aaronsen, Norges sjømatråd.

 

 

Krema tagliatelle med laks

Pasta kjem i uendeleg mange former og fasongar og er ein del av den klassiske italienske matkulturen. Visste du at pasta betyr deig? Pasta er vanlegvis laga av kveitemjøl, vatn og salt, men kan også tilsettast andre ingrediensar for å gi farge og smak, det som er mest vanlege er å tilsette egg.

Tagliatelle eller bandspagetti er lange og smale plastaband oftast laga av durumkveite med egg i. Når du skal koke pasta, ta alltid utgangspunkt i det som står på pakken. Legg alltid pasta i fosskokande vatn i eit stor kjelde med nok vatn og litt salt. Pasta utvidar seg under koking og den skal ikkje overkokast, men serverast med tyggemotstand eller  «al dente».

Som Norges sjømatråd seier: «Leiter du etter ein enkel middag med nydeleg laks og krema pasta? Sjå ikkje lenger! Med denne oppskrifta får du ein sunn, velsmakande middag på kort tid». Velbekomme!

LAKS: Krema tagliatelle med laks. Foto: Studio Dreyer + Hensley, Norges sjømatråd.

Ingrediensar (4 porsjonar)

400 g laksefilet

4 pors tagliatelle

2 sjalottløk

½ purreløk

150 g friske erter

2 dl kremfløyte

½ sitronzest

olje

salt og pepar

frisk basilikum

 

Framgangsmåte

Skjer laks i passande terningar. Kok pasta som anvist på pakken, tilsett ertene i dei siste minutta av koketida. Kutt sjalottløk i små bitar og purre i ringar. Surr løken blank i litt olje, og steik så laksen i panna nokre minutt, behald kjernen på fisken litt rå. Tilsett purre saman med sjalottløk og laks. Ta laksebitane ut av panna. Tilsett fløyte i panna, kok opp og la i ca. 2 minutt. Smak til sausen med salt og pepar og rive sitronskall. Sil av pastaen og vend inn fløytesausen. Dander laksebitane på toppen, og dryss over friske basilikumblad.

 

Smak parmesangratinert skrei med bakte rotgrønsaker

Det er umogleg å sleppe tak i skreien no når vi er midt i sesongen, så her kjem endå ei oppskrift på korleis ein kan lage eit festmåltid av denne lekre råvara. Sjømatelskarar over heile verda set pris på skreien, og no kan vi også eksperimentere med skrei med ny vri.

Skrei har ein mild smak og det kan vere spennande  «å piffe den opp» med parmesangratinering. Parmesan er ein italiensk, fast og feit ost med smak av både salt og sødme. Osten er mest kjent som fast tilbehøyr til pastarettar og italienarane brukar den som krydder i matlaginga.

Å lage parmesangratinert skrei er overraskande lettvint, og saman med bakte rotgrønsaker vert dette både eit eksklusivt og smaksrikt festmåltid. Hurra for skreien vår!

SKREI: Smak parmesangratinert skrei med bakte rotgrønsaker. Foto: Studio Dreyer + Hensley, Norges sjømatråd.

Ingrediensar (4 porsjonar)

800 g skreifilet, utan skinn og bein

Parmesankrem

½ ts flaksalt

1 eggeplomme

2 ss fløyte

50 g riven parmesan

1 fedd kvitløk

1 ss rosmarin

 

Rotgrønsaker

2 søt potet

1 sellerirot

2 ss rosmarin

5 ss olivenolje

salt og pepar

sitronsaft

 

Råkost

1 crispisalat

250 g råkost

2 ss grasløk

½ sitron

4 ss olivenolje

salt og pepar

Fremgangsmåte

Rosmarinbakt selleri og søtpotet.

Forvarm omnen til 200 grader. Skrell og kutt sellerirot og søtpotet i store klossar på 3-4 cm. Slå over olje, salt og hakka rosmarin. Legg dei i eldfast form med bakepapir i botnen og bak dei i 40 minutt på 200 grader med varmluft. Dei skal bli godt bakte å få ein fin farge og mjuk konsistens. Press over sitronsaft ved servering.

Parmesangratinert skrei

Dryss litt salt over og under skreien og legg den på ei eldfast fat/form. Rør saman alle ingrediensane til parmesanrøra i ein bolle og fordel denne over heile overflata på skreien. Set forma/fatet midt i forvarma omn ved 200 grader med grillfunksjon. La skreien steike til den har fått ei fin gratinert skorpe i omtrent 10 minutt. Sjekk den tjukkaste delen av fileten om den flakar når du pressa på den, då er den ferdig steikt og perfekt til servering. Er den litt rå, skru av omnen og la fisken stå og trekke nokre minutt.

Frisk Råkost

Hakk grasløk og bland inn sitronsaft, salt, pepar og olivenolje i ein stor bolle. Bruk gjerne ferdig råkost-mix som du finn i butikken. Dersom ikkje kan du lage din eigen med for eksempel gulrot og kål. Vend råkosten og crispisalaten i bollen rett før servering.