Grilla 17.mai-laks med agurksalat

Våren er her med lovande solskinsdagar, nyutsprungen bjørk og kvitveisen blømer i bakkane. Laks er kanskje kvardagsleg, men av og til kan det vere tilbehøret og grillinga som løftar retten. I denne oppskrifta lagar du agurksalaten og potetsalaten frå botnen av og serverer det saman med den grilla laksen.

Mange har sikkert allereie starta grillsesongen, men i dag vert det tips om fisk på grillen. Når ein skal grille fisk direkte på grillen er det smart å behalde skinnet på, det gjer fisken lettare å handtere. Sørg alltid for å ha rein rist. Pensle fisken og rista med olje før du startar med å grille. Dersom fisken er marineret, bør du tørke den med kjøkkenpapir før du penslar den. Fiske må ligge på grillen i ca. to minutt, då får den steikskorpe og du unngår at den går i to når du snur den.

Nasjonaldagen er for mange ein kjekk og hektisk dag med nystrokne bunadsskjorter og  flagg, ungar som skal pyntast, barnetog som skal beundrast og god mat som skal etast. Dersom vêret held finnast den inga betre avslutting på dagen enn å legge laks på grillen. Hipp hurra for 17.mai!

17. MAI: Grilla 17.mai-laks med agurksalat. Foto: Norges Sjømatråd, Esten Borgos.

Ingrediensar til 4 porsjonar

700 g  laksefilet, med skinn 
2 stk  sitron 
2 ss  estragon 
olivenolje 
salt og pepar 

Agurksalat

1 stk  agurk 
1 ss  sukker 
1 ss  kvitvinseddik 
1 ss  olivenolje 
salt og pepar 

Potetsalat

600 g  potet 
5 stk  reddik 
1 stk  raudlauk 
2 ss  dill, frisk 
2 dl  spinat 
2 dl  lettrømme 
1 dl  majones 
3 ss  peparrot 

Framgangsmåte

• Skjær laksen i serveringsstykke, pensle med olivenolje og dryss med salt og pepar.
• Ha safta av sitron og estragon over laksen.
• Grill laksen med skinnsida ned i ca. 4 minutt, snu den og grill i 2 minutt på den andre sida.

Agurksalat

• Skjær agurk i tynne skiver, gjerne med ostehøvel.
• Rør sukker ut i kvitvinseddik, og bland med olivenolje.
• Smak til med salt og pepar, og bland med agurkskivene.

Potetsalat

• Kok potet møre i usalta vatn, avkjøl og skrell.
• Del poteten i mindre biter, skjær reddik i skiver, raudlauk i strimlar og hakk dill.
• Ha potet, reddik, raudlauk, dill og spinat saman i ein bolle. 
• Bland saman lettrømme, majones og riven peparrot, og smak til. 
• Ha sausen i bollen med grønsakene og bland godt saman.

Server grilla laks med agurksalat og potetsalat ved sidan av.