Julestemning med sild på bordet

Julefrukost og sild høyrer saman og det blir ikkje skikkelig julestemning utan sild på bordet. Det finnast ei mengd med oppskrifter på klassiske sildepålegg som tomatsild, sursild, karrisild og sennepssild. Sild kan smaksettast på mange måtar, ho er ei lita næringsbombe og det er ingen grunn til at vi ikkje skulle ete meir av den!

Det er stas med heimelaga sildepålegg og i butikken finn ein ferske sildefiletar som ein kan bruke til å lage sildepålegg av. Ein kan også bruke sildefilet frå boks eller pakke, men då treng filetane ein rask skyl i mjølk for å kvitte seg med salt.

Det er lov å jukse litt når ein skal lage heimelaga sild, ved å bruke til dømes ferdig kryddersildfilet. I denne oppskrifta er det tatt utgangspunkt i kryddersild på glas og tilsett nøter, eple og mynte for å gi pålegget ein ny smak. «Av sild blir du snild» var eit av slagordet til det gamle opplysningskontoret for fisk, kanskje det kan kome til nytte før julenissen bankar på døra? Med ønske om ei snill og god jul til alle!

NØTTESILD: «Av sild, blir du snild». Norges Sjømatråd, Esten Borgos.

Ingrediensar til 4 porsjonar

4 stk kryddersildfilet

4 dl vatn

3,5 dl sukker

2 dl 7% eddik

1 stk eple

50 g hasselnøter

1 dl kremfløyte

50 g majones

1 ss frisk graslauk

Frisk mynte

Framgangsmåte

• Smak på sildefiletane og legg dem i vatn eller mjølk eit par timer dersom dei er for salte.
• Kok opp vatn og sukker, og avkjøl, og tilsett eddik. Legg sildefiletane i eddiklaken og la dei liggje over natta i kjøleskap. 
• Tørk sildefiletane og skjer dei i bitar.
• Skjer eple i terningar og grovhakk hasselnøtene.
• Pisk kremfløyte til krem og bland med majones, graslauk og mynte.
• Rør inn eplebitane og hasselnøtene, og vend inn sildebitane. 
• Ha blandingen i eit glas eller krukke og legg på lok.
• Silda bør trekke eit døgn i kjøleskap før den etast.

Sild er haldbar i kjøleskap i ca. 1 veke.